แกงเห็ดบดใส่น้ำย่านาง ส่งจากทางลาซาลครับ

ตกมาปีนี้อากาศทางลาซาลซงสีหนาวๆ ตั้งแต่อยู่มา 5 ปีกะมีปีนี้ล่ะเด้อพี่น้อง ซูปีมีแต่ฮ้อนกับฝน
ย้อนอากาศซงสีเย็นๆ เฮ็ดให้คิดฮอดบรรยากาศทางบ้านเฮา เลยคิดหาแนวซดฮ้อนๆเบิ่งกะน้า
ซอกเบิ่งในช่องฟิชเห็นถุง "เห็ดบด" ที่เอามาแต่บ้านเฮา แช่แข็งยุตั้งแต่ตอนออกพรรษา เลยเป็นที่มาของกระทู้นี้ครับ



แนะนำอีกจักหน่อย บางท่านอาจสิคิดว่า "เห็ดบด" กับ "เห็ดขอนขาว" เป็นอันเดียวกัน ขอบอกว่าเป็นเห็ดคนละอย่างเด้อ
แต่เป็นเห็ดตระกูลเดียวกันซือๆ เห็ดบด กะคือดอกอ่อนของเห็ดกระด้างนั่นเอง ดอกสิออกสีน้ำตาลเข้มตั้งแต่เกิด (ตามรูปด้านบน)
ส่วนเห็ดขอนขาว สิมีสีขาวตอนเป็นดอกอ่อน พอแก่โตมาสิออกเป็นสีน้ำตาล ดอกแก่สิซุปบ่ได้คือเห็ดกระด้าง
เพิ่มเติมครับ เห็ดบด เห็ดลม : http://thainorthernfarms.igetweb.com...e&qid=41926303


เกริ่นมาหลายแล้ว เข้าเรื่องเลยครับ
วัตถุดิบ : เห็ดบด , หัวซิงไค , พริกแห้ง , หอมแดง , ผักอีตู่ , ใบผักขา , ใบย่านาง
เครื่องปรุง : น้ำปลา , น้ำปลาแดก , ผงนัว
ข้อสังเกตุ : ถ้าแกงใส่น้ำย่านาง สิบ่ได้ใช้วัตถุดิบที่มีรสเปรี้ยวครับ สิเฮ็ดคล้ายๆเฮาแกงหน่อไม้ แต่บ่ได้ใส่ข้าวเบือ
ถ้าแกงเห็ดธรรมดาทั่วไปจั่งสิใส่ใบผักติ้ว ใบโมง ใบกระเจี๊ยบให้ออกรสเปรี้ยวนำ ครับผม


เอาเห็ดบดออกจากช่องฟิช พักไว้ให้น้ำแข็งละลายครับ






ล้างใบย่านางให้สะอาด แล้วคั้นให้ได้น้ำข้นที่สุด แฮงข้นหลาย แฮงแซบหลาย (ซื้อที่ตลาดลาซาล 10 บาท)






ทุบพริกแห้ง หอมแดงพอแตก ตามด้วยหัวซิงไคลงในหม้อ ปรุงรสด้วย น้ำปลา น้ำปลาแดก ผงนัว แล้วยกขึ้นตั้งไฟ




ระหว่างรอหม้อเดือด กะย่างลงไปเก็บผักอีตู่ กับผักขายุข้างฮั้วหน้าหอ ป้าเจ้าของหอเพินปลูกไว้ครับ ได้มาซำนี้ล่ะ ผักขาบ่ป่ง ย่อนเบิดฝนแล้ว




พอหม้อเดือด กะว่าน้ำย่านางสุกแล้วจั่งใส่ผักขากับผักอี่ตู่ลงไป ซิมรดชาดแล้วยกลงเสิร์ฟได้เลยครับ






ซดน้ำฮ้อนๆกะเข้าท่ายุ เปลี่ยนบรรยากาศ กินแต่ข้าวตามสั่งหลายกะหน่ายเป็นเด้เนาะพี่น้อง




แนวกินตื่มกะได้ตำแจ่วพริกดิบ ทอดปลาหมึกกับกุนเชียง ขั่วจี่หล่อ ตบท้ายด้วยกล้วยไข่




มาครับ กินข้าวแลงนำกัน เล็กๆน้อยๆจากทีมงาน ขอบคุณเอื้อย-อ้ายที่แวะยามกระทู้ ขอบคุณบ้านมหาสำหรับพื้นที่นำเสนอครับ