เรื่องที่ว่าสิโพสต์ลงต้ะกลางพรรษาปีที่ผ่านมาบ่ได้โพสต์เอามาลงมื้อนี้ก่อนหน่อนางดินออกกะแล้วกัน
บ่ฮู้สิใช้คำได๋ครับสำหรับชื่อไม้ที่ใช้ขูดหน่อไม้เผาให้เป็นเส้นฝอยก่อนไปต้มน้ำขมออกและอู๋ใส่น้ำยานาง
ใส่ปลาร้าเติมชูรสใบแมงลัก ปรุงให้นัวแต่อยู่ในหม้อหลังจากนั้นค่อยนำไปตำซุ้บใส่ครก พริกดิบหอมกระเทียม
ย่างไฟเล็กน้อยโขลกเติมเครื่องปรุงรสอีกครั้งโรยใบสะระแหน่กายเป็นซุ้บหน่อไม้ในที่สุด
หลังจากใช้ซ่อมเคี่ยนหน่อไม้ซ่อมผัดมาเคี่ยนมือคน ไปเห็นลวดอ้อกเชื่อมสแตนเลสเส้นน้อยๆ นึกถึงตะปูที่
ตีใส่ไม้เคี่ยนหน่อไม้อันอยู่บ้านตะสังเป็นเด็กน้อย เอน่าจะเฮ้ดไม้เคี่ยนหน่อไม้ไว้จักอันน้า บ่แม่นแนวเฮ้ดยาก
ว่าแล้วกะลงมือทดลอง ไปขอลวดเชื่อมสแตนเลสจากช่างเชื่อม หาเศษไม้แพคสินค้ามาเหลา
ครับเหลาไม้เป็นด้ามไม้เคี่ยนหน่อไม้ น้อยใหญ่สั้นยาวแบบได๋แล้วต้ะผู้เฮ้ดสิเฮ้ดสิออกแบบ
ผมตัดลวดเชื่อมยาวพอขูดลงไปในเนื้อหน่อไม้แล้วตีด้วยฆ้อนเหล็กให้เป ตกแต่งให้มนบ่เอาแบบคมครับ
เดี๋ยวสิบาดมือผู้เคี่ยนหน่อไม้เสียเอง เจาะรูตรงหัวของไม้ด้ามแล้วตอกฟันของไม้เคี่ยนหน่อไม้ลงไป
ตอกลงแล้วจัดให้อยู่ในลายลองเด้อครับ ให้ฟันมันลองไปนำกัน แค่นั้นก็เป็นอันเรียบร้อย
มาลองขูดหรือเคี่ยนหน่อไม้ปิ้ด หน่อไม้เผา คือครับเสร็จไวและบ่เจ็บมือถ้าบ่เฮ้ดหล่วยใส่มือเจ้าของเสียเอง
อันแรกเข่าท่า อันใหม่ได้ไม้เนื้อแข็งจากเศษไม้ต้ะตอนเฮ้ดเตาเมื่อสามสี่ปี
ไม้ข่อหล่อแข่แหล่เอามาซอยขนาดเหมาะมืออีโต้ถากแล้วตะไบบุ้งถูให้เป็นรูปทรงออกไปทางเป หัวเชิดเจ้ยปาก
แต่ไม้สักสิเฮ้ดง่ายกว่าไม้เนื้อแข็งอื่นๆและสวยงามดี
เที่ยวนี้เปลี่ยนฟันขูดเป็นตะขอห้อยของที่มีขายตามร้านวัสดุ เนื่องจากฟันจากลวดเชื่อมเสียเวลาตอนทุบและตกแต่ง
ตะขอรูปตัวแอล เอาคีมตัดส่วนฉากออกให้เหลือแต่ส่วนเกลียวกับส่วนที่ตรงออกมาจากเกลียว
แหลมปลายนิดหนึ่งแต่อย่าให้แหลมคมครับเอาแหลมพอตู้ๆ เดี่ยวมันสิแทงมือยามเคี่ยน
สว่านเจาะด้ามตรงปากที่เจ้ยขึ้นแล้วหมุนเกลียวของสกรูแอลที่ตัดแต่งเรียบร้อยลงไปจำนวนเจ็ดฟันกำลังดี
อีโต้ถาก ตะไบบุ้งถู กระดาษทรายเบอร์หยาบเบอร์ละเอียด น้ำมันบักพร้าวขัดตื่มให้เหลี่ยมลงแลคเกอร์ย้านมันขู๋ใส่
หน่อไม้บาดโดนไป เบิดมื้อได้สามอันขายสามอันร้อยสิมีผู้ซื้อให้บ่บุ้ บ่เป็นหยังเน้นเฮ้ดไว้ใช้ในครัวเรือน
ทดลองเคี่ยนทั้งไผ่บงนาไผ่บงเขาบ่ผิดหวังครับ บ่ต่อนใหญ่และบ่หมุ่นหลาย เป็นตามีไว้ใช้ยุ่ครับ
เฮ้ดใส่ครัวไว้เด้อครับผู้มีเวลาว่าง เฮ้ดรูปทรงแบบน่ารักๆให้ผู้ใช้เพิ่นยิ้มไปนำยามเคี่ยน
เคี่ยนแล้วๆ กะเอามาต้มน้ำขมออกแล้วญ๋องน้ำยานางอู๋แซ้บๆ แบ่งใส่ถ่งใส่ตู้เย็นไว้ซุบได้อีกหลายเทื่อครับ
ขอบคุณบ้านมหา