ยินเสียงเพรียกก้อง กระทาดงต๊อกต้อส่ง
อัสดงสิลับไม้ ใบข้าวโน้มก่องกวย
หอมฮวยๆ โชยฟุ้ง อบอวลตามท่ง
จักจั่นดง ฮ้องสั่งซู้ ดังก้องสนั่นมา
เขียดจานาพองคอเว้า คุยสาวยามใกล้ค่ำ
แอ็บ แอ็บ ตามป่าข้าว ฟังแล้วกะม่วนยิน
กาเอี้ยงบินเมือบ้าน คืนคอนดอนป่า
ูหมู่ชาวนาวางเวียกไว้ คืนบ้านต่าวเมือ
ฝูงหมู่เด็กหนุ่มน้อย หาปลาจนค่ำ
บ้างผ่องใส่เบ็ด ดักลอบไว้ ยามไซแล้วสิต่าวเมือ
สุขใจเหลือหาปลาได้ ยามแลงสิต้มอ่อม
หุงหาภาช์แลงไว้ คองถ่าพ่อแม่ตน
เกิดเป็นคนต้องทนสู้ วิถีเฮาบ่อคือเผิ่น
เดินตามนาป่าไม้ สุขใจแล้วส่ำที่เป็น
ขอบคุณเจ้าของภาพงามๆ จากเน็ต ครับ